Hafnarborg – menningar- og listamiðstöð Hafnarfjarðar var stofnuð árið 1983 og varð um leið aðsetur listaverkasafns Hafnarfjarðarbæjar. Stofnendur Hafnarborgar, Sverrir Magnússon, lyfsali, og Ingibjörg Sigurjónsdóttir, lyfjafræðingur og kona hans, lögðu grunn að safninu með listaverkagjöf sinni árið 1983. Á 75 ára kaupstaðarafmæli Hafnarfjarðar, 1. júní 1983, afhentu þau bænum með gjafabréfi húseignina að Strandgötu 34 ásamt veglegu safni listaverka og bóka. Húsið var upphaflega hannað af Guðjóni Samúelssyni, arkitekt, fyrir Sören Kampmann, lyfsala, sem bjó þar og rak apótek frá árinu 1921. Sverrir Magnússon tók síðan við húsinu og rekstrinum árið 1947 og stóð fyrir rekstri Hafnarfjarðar Apóteks til ársins 1984.

Í gjafabréfinu kváðu Sverrir og Ingibjörg á um að í húsinu skyldi starfrækt menningarstofnun sem skyldi hafa það að markmiði að efla lista- og menningarlíf í Hafnarfirði, með rekstri listaverkasafns, sýningarsala og gestavinnustofu fyrir listamenn, auk þess sem þar væri vettvangur til tónleikahalds. Hafnarborg var síðan formlega vígð 21. maí 1988, eftir að reist hafði verið viðbygging við húsið, hönnuð af Ingimar H. Ingimarssyni, arkitekt.

Hlutverk Hafnarborgar – menningar- og listamiðstöðvar Hafnarfjarðar er að standa fyrir öflugu og metnaðarfullu menningarstarfi sem endurspeglar gerjun samtímans og stuðla þannig að fjölbreyttu mannlífi. Hafnarborg varðveitir því listaverkaeign Hafnarfjarðarbæjar og stendur fyrir rannsóknum og sýningum á henni, þannig að fólk fái þeirra notið og verkin verði sýnilegur hluti íslenskrar menningar- og listasögu. Enn fremur rekur Hafnarborg alþjóðlega gestavinnustofu.

Hafnarborg starfar samkvæmt eigin stofnskrá¹ og stefnu, menningarstefnu Hafnarfjarðarbæjar, íslenskum safnalögum og siðareglum Alþjóðaráðs safna.

¹Stofnskrá: gjafabréf og viðauki.

Sýningardagskrá Hafnarborgar er fjölbreytt en að jafnaði eru í safninu haldnar 8–10 myndlistarsýningar á ári, þar sem finna má verk er spanna íslenska listasögu allt frá þjóðargersemum frumkvöðlanna til tilraunakenndra verka listamanna samtímans. Fyrirlestrar og málþing í tengslum við sýningar safnsins eru fastur liður í dagskránni auk þess sem áhersla er lögð á að bjóða upp á samtal gesta við listamenn og sýningarstjóra og stuðla þannig að áhugaverðri upplifun af sýningum, sem og aukinni þekkingu á safneign og starfsemi stofnunarinnar. Þá eru listasmiðjur og leiðsagnir fyrir börn einnig meðal reglulegra viðburða safnsins. Loks er boðið upp á fjölda tónleika allan ársins hring, svo sem hina vinsælu hádegistónleika og Síðdegistóna yfir vetrartímann, auk samtímatónleikaraðarinnar Hljóðana að vori og hausti og Sönghátíðar í Hafnarborg á sumrin.

Aldís Arnardóttir
Forstöðumaður
aldisa@hafnarfjordur.is

Hólmar Hólm
Verkefnastjóri kynningarmála og útgáfu
holmarh@hafnarfjordur.is

Sigtýr Ægir Kárason
Móttöku- og þjónustufulltrúi
sigtyr@hafnarfjordur.is

Ólafur Gunnar Sverrisson
Umsjónarmaður fasteigna
olafurs@hafnarfjordur.is

Unnur Mjöll S. Leifsdóttir
Verkefnastjóri fræðslu og miðlunar
unnurleifs@hafnarfjordur.is

Þórdís Jóhannesdóttir
Verkefnastjóri sýninga og safneignar
thordisj@hafnarfjordur.is

Stjórn Hafnarborgar
Valdimar Víðisson
Pétur Gautur Svavarsson
Margrét Hildur Guðmundsdóttir

Listráð Hafnarborgar
Brynhildur Pálsdóttir
Erling T. V. Klingenberg
Ingunn Fjóla Ingþórsdóttir